賤格變時髦?

繼把口臭過馬桶既所謂 IT 人之後，今朝晨早流流搭地鐵又見到 D 行為令人不齒既賤人。

有兩個互不相識既後生仔，一上車見到有兩個位，就以迅雷不及掩耳之勢將屁股一沉坐低。另一邊廂，有一個仲早過佢地上車既阿婆正搖搖欲墜咁行緊過去。原本你地身手敏捷，又睇唔到阿婆，其實我都無咩好講，不過最衰俾我見到佢屁股下沉果一剎那眼尾係睄到阿婆既。咁佢點做呀? 咪即刻攞 Pocket PC 同 iPod 出黎扮咩都唔知囉。

我最慶既係，我無誇張，個阿婆真係企唔穩就跌就跌咁，呢兩條敗類都可以若無其事繼續玩佢地既 gadgets。我心諗，究竟係你兩個都咁不幸係孤兒，屋企無老人家，定係佢地食左秦始皇御賜長生不老藥，一定無阿婆呢一日? 諗來諗去，我覺得最有可能都係佢地好有自知之明，知道自己咁賤格，一定唔方長命得去邊，應該都等唔到阿婆呢一日架啦，咪索性唔讓囉。

如果佢兩個咁啱又係孤兒，又無讀過書，咁無人教過佢讓座都唔奇。但係兩個都著恤衫打呔，又有錢買埋 D 幾千蚊既 gadgets，睇落又唔似文盲喎。究竟係賤格已經成為時髦，定係唔賤格係香港真係生存唔到?

我睇住呢兩條友，不禁將我早兩日鬧阿 IT 人果 D 刻薄句子係心裡面再 repeat 左一次...